మినిస్ట్రీ ఆఫ్ హోమ్ అఫైర్స్, న్యూ ఢిల్లీ వారి ఆదేశాల మేరకు 2015 నుండి తెలంగాణ రాష్ట్రం ఆపరేషన్ ముస్కాన్ (చిరునవ్వు) ను ప్రతి జనవరి మరియు జులై మాసాలలో ఆచరణలో పెడుతుంది. ఆపరేషన్ ముస్కాన్ లో భాగంగా ఒక SI, నలుగురు పోలీస్ కాన్స్టేబుల్స్ బృందాలుగా విభజించి ప్రతి సబ్-డివిజన్ కు ఏర్పాటు చేస్తారు. వీరు కనిపించకుండా పోయిన పిల్లలను, పారిపోయిన పిల్లలను, అక్రమ రవాణాకు గురైన పిల్లలను, బాలకార్మికులను, బంధిత కార్మికులను, శిక్షిత భిక్షగాళ్లను, వీధి బాలలను మరియు పనివాళ్లుగా పనిచేసే పిల్లల జాడను వెతికి పట్టుకుంటారు. ఆపరేషన్ ప్రారంభించే ముందు WDCW, రెవెన్యూ, లేబర్, రైల్వే, సోషల్ వెల్ఫేర్, NGOలు, విద్యాశాఖ, ఆరోగ్యశాఖ, స్టేట్ లీగల్ సర్వీస్ అథారిటీ వంటి అనేక శాఖలతో సమావేశం ఏర్పాటు చేసి సమన్వయంతో ఒక నిర్ణయానికి వస్తారు. పోలీసు బృందాలకు శిక్షణా తరగతులు ఏర్పాటు చేసి ఆపరేషన్ లో భాగంగా పాటించవలసిన నియమాలు, చట్టపరమైన విధానాలు, JJ చట్టం మరియు POCSO చట్టం గురించి పూర్తిగా వివరించి వారిలో స్ఫూర్తిని నింపుతారు. కనపడకుండా పోయిన పిల్లల వివరాలను "ట్రాక్ చైల్డ్ పోర్టల్" లో అప్‌లోడ్ చేయమని వారికి చెప్పడం జరుగుతుంది. ఆపరేషన్ ముస్కాన్ సమయంలో ఇతర రాష్ట్రాల పిల్లలు కనుగొనబడితే సంబంధిత రాష్ట్రాలకు వీరిని సురక్షితంగా తరలించడానికి బృందాలను ఏర్పాటు చేసుకోమని సందేశాలు వెళ్తాయి.